• 31°C
香港時間:2018721日 (六) 17:28

【書展限定】即場訂閱hket電子版,低至85折及豐富禮品(Hall 1A-E07)

以後大家都好忙

副刊版 2018/01/12

分享:

我今早幻想:如果有一日,全香港人都知我違法,我對住公眾講唔講得出「因為我日日忙到甩轆」,去解釋我嘅違法行為呢?跟住我又在想:其實香港人有邊個唔忙嘅呢?我用「忙」呢個咁lame(「削」)嘅理由去合理化自己嘅違規行為,講出嚟會唔會有啲心虛呢?再諗:心虛講出嚟之後,我以後仲好唔好意思面懵懵當無事發生一樣,繼續在教育界「作育英才」呢?

若有人問:「嘩,你仲好意思繼續嘅?﹗」我又可唔可以答:「我入教育界前,係經過深思熟慮,先至承諾擔任呢個工作嘅,對呢份工有一份熱情,所以,我係唔會辭職嘅!」好喇,俾我死頂到呢個地步,我每日返工面對着有同樣專業資格嘅同事,會否覺得佢哋心裏面響度掩住嘴竊笑緊自己呢?

日後有學生犯錯時,我如何用「正氣凜然」嘅口吻同佢講「你咁做唔啱喎」呢?執行校規時,驚唔驚俾人回一句:「講咩吖你,你咪又係唔好得幾多!」若果學生同我講:「你真係有所不知,我哋身為學生都同你一樣,平日忙到好得人驚㗎!既然有人包容你,你家下又可唔可以同樣包容下我呢吓?」我可以點樣先唔對住佢流露出一絲絲羞愧嘅表情呢?幻想中嘅每一步,我已有「唔好意思」之感,於是我又再想:咁究竟咩嘢人先做得出可以響以上每一步都若無其事、毫無心虛怯情之意呢?又,乜嘢機構lame到可以包容一個「因為好忙而犯法」嘅職員呢?

咦,如果「好忙」呢個藉口咁好使,咁下次市民違例泊車呀、走稅啊、非法僱傭呀、僭建呀,又可唔可以同個執法人員或法官講以下呢番話呢:「我實在太忙,我的而且確當時係唔夠警覺性去跟進呢件事,請你唔好扣我分/罰我款/判我罪啦,嚟啦!你哋依家好包容、好易話為𠺝!」

撰文 : 利嘉敏

欄名 : 攻關女子

緊貼財經時事新聞分析,讚好hket Facebook 專版