• 34°C
香港時間:2018528日 星期一 15:38

一班中女約去「威」

副刊版 2018/02/15

分享:

一班識於微時的中女相聚歎茶,有日理萬機女強人,也有誕B烈女竟變賢妻良母家庭至上,大家難得拋開煩事大解放,登時七嘴八舌。有人忽然想當年,從尖沙咀Regent、廣東道Canton到中環喜喜(俱往矣)一直懷緬,回味玩到凌晨仍面不改容的那些年。A慨歎:「仲邊有呢枝歌仔唱吖,大嘅考完又到細嘅測驗!」B接口:「依家夜晚只忙於同美國總部開call!」我則說:「踏正十一點即準時約會周生。時而思念太甚,急不及待提前十點就赴會!」C高呼:「嘩!咁點得㗎?﹗想當年我哋……」於是,大家係威係勢揚言搵日威番晚。

好不容易夾到時間,眾歡呼!就在興高采烈拿手機記低「同姊妹去威」之際,D突然爆出一句:「咁我哋嗰日諗住去邊度威呀?點威呀?」瞬間靜寂,各人滑屏的指頭凝於半空,你眼望我眼,腦袋一片空白。一言驚醒,如今最大挑戰不是夾時間,而是究竟去邊?做咩呢?點威呢?熟透中女已非當年精力無限跳跳紮之十八廿二,現在體能所限,包括:唔攰得、唔等得、唔迫得、唔餓得、唔夜得、唔勞得、唔嘈得、唔激得、唔凍得、唔企得——咁嘅條件限制,豈有豪情似舊時?老實說,如今莫講話新年倒數、行花市、唱夜K、睇午夜場早已絕迹,就連食晚飯食晏些少都已跌晒watt眼鯨鯨、呵欠連連只想返歸,咁嘅款仲點去威呢?

E提議:「咁去尖東睇燈飾喇!」眾即ban:「得嗰十度咋,凍死人咩!」「嗰度好大風㗎!」「咪搵啲咁嘅嘢玩啦!」「依家吹兩吹即頭痛!」F忽然問:「話時話,你哋有無開始膝頭哥痛?醫生話我膝頭有少少退化。」大家積極分享:「我食嗰隻葡萄糖胺幾好喎!下次帶樽俾你!」「依家學緊太極養生班,幾好㗎!又唔傷關節。」「嗰排去針灸,幾有效喎!」「得閒煲桑寄生茶飲下啦,補腎兼對筋骨好!」講講下,由傾「去威」變成談「養生」,眾忽哈哈大笑,明白人生皆有不同時段,「去威」有時、「養息」有時,無謂強求,最重要是懂得欣然接受和享受不同的人生階段。到最後,「去威番晚」從無發生,再次相約共進一餐「早」晚飯,愉快自在,更勝喧鬧夜消磨。

撰文 : 利嘉敏

欄名 : 攻關女子

緊貼財經時事新聞分析,讚好hket Facebook 專版