• 28°C
香港時間:2018717日 (二) 06:20

我愛母乳

副刊版 2018/05/10

分享:

不能說廣東話特別優越,因優越包含有所比較之意味,而語言和文化根本不是用來較量的;只能說,我在香港成長,故能欣賞廣東話精妙、絕核、到位及盞鬼之處。少時曾在外國生活,用英語交談、閱讀、講課,甚至搦筆寫文都無問題,亦已習慣,但腦袋的即時思維和語言,係廣東話乃無得呃的事實,所以,何必要扮偽ABC(American-born Chinese),這根本不牽涉「好」或「唔好」的問題,而是「係」定「唔係」的事實;若「唔係」而夾硬扮「係」,乃自欺欺人兼夾陰陽怪氣。

用屬於自己的語言說話,即使發噏風,也格外痛快,所以,我要用廣東話大發噏風:

「呢排唔知係咪天口㷫,搞到好多人亂噏廿四,明明飲自己阿媽嘅奶大,就死口唔認。母乳呢家嘢無得呃,你飲邊個嘅,唔通自己唔知?母乳係一個人成長嘅根,呢個問題一啲都唔無聊,唔曉答嘅,自己戙高床板諗一諗,點解唔肯(敢)認自己阿媽係老媽子。香港地,一樣米養百樣人,有托大腳嘅、擦鞋嘅、食塞米嘅、唔知埞嘅、生沙蝨嘅、無腰骨嘅,以為死口唔認、死撬唔答,就可以印印腳等上位?真係癡癡呆呆坐埋一枱,食懵咗呀?﹗人各有志,唔阻你豬籠入水,但家陣燒埋我嗰疊,夾硬話人哋細細個飲嘅奶,唔係自己阿媽嘅,係另有其人,搵老襯呀?﹗真係「call now yeah」(粵劇官話:可怒也)!我飲邊個嘅奶大,唔通你清楚得過我?﹗

「阿生阿姐,你哋牛龜咁大先嚟轉口味鍾意飲人哋嘅母乳,無所謂,但你哋無情唔好迫埋冚唪唥人都要無義,真係抵唔住頸要講句:大人大姐,依家先嚟嫌自己阿媽啲奶唔夠好、唔夠照?有乜景轟?你班乜水唔覺核突,我都戥你哋醜!家下你哋阿媽啲奶好失禮咩?作死呀,生嚿叉燒好過生你咯!飲阿媽奶大呢樣嘢,係搣唔甩嘅事實,我就自覺好威水,若果咁都唔肯認,真係該煨咯!」

用廣東話發完噏風,確係爽!

皆因,廣東話係我母語,亦係我底綫。

撰文 : 利嘉敏

欄名 : 攻關女子

緊貼財經時事新聞分析,讚好hket Facebook 專版