• 28°C
香港時間:2018716日 (一) 03:30

不做「怪獸子女」

副刊版 2018/06/22

分享:

決心不做「怪獸子女」,我先着手改變跟阿媽的談話方式。以往,我周末回家吃飯,例必問她「有否做運動?有否少吃這少吃那?」連串問題,就如「怪獸家長」質問子女「做晒功課未?點解測驗無100分?」一樣。現在回頭看,縱以關心她健康為出發點,但下下「恨脂不成鋼」般口吻,實在惡頂。當我決心要跟阿媽製造更多美好「對話」片段後,人頓然放輕鬆。自此,着眼和焦點放在吾等「關係」而非「距離」上。

人際傳播學裏,強調要跟目標人物溝通,必須先由其關心和有興趣之事切入。我阿媽現階段人生只有三大興趣:美食、煲劇和睇股票(即睇多多、買少少)。於是,我搜羅大堆烹飪書,盼她閒時多點閱讀,藉以使腦內神經元的連接更綿密,減少腦退化機會。想不到,平時「見字即頭暈」的她,竟逐頁看完兼做筆記!每次回家,我就細聽她興致勃勃講解跟傭人姐姐試做了甚麼新菜式,她們如何改進味道等。跟她談論劇集,才發現阿媽有其獨到見解:「大台拍宮廷劇,人就很多,衫都靚,但啲女主角唸對白跟拍時裝劇一樣,無咗古時女子應有嘅韻」、「吳岱融好戲,眼神同表情做得好細緻」、「嗰個×××三十幾歲就無晒型,睇佢追賊跑到似大叔咁!」笑到我噴飯。

我阿媽亦喜歡股票,每天例必看她那幾位心儀股評人分析教路,為了考佢腦筋是否靈活,我同佢玩搶答股票冧把遊戲,阿媽題題答中,我就樂滋滋地宣布:「毫無退化迹象,而且仲叻過我!」她即哈哈大樂。為免傷和氣,我寧願假手於人,安排物理治療師每星期上門教她做運動;一段時間後,媽媽雙腳肌肉強化了,上街走路不再那麼吃力,並可走較遠路程。貪玩的她嘗過了甜頭後,竟自動自覺每天早晚都做運動。現在我每次回家吃完晚飯後,坐在梳化休息時,必被站着不肯坐低的阿媽「哦」:「食完飯咪咁快坐啦!好易肥㗎!」脫離「怪獸子女」行列,輪到我嬉皮笑臉:「嘻嘻,今日好攰,坐一陣啫!唔會咁快肥嘅!」

撰文 : 利嘉敏

欄名 : 攻關女子

緊貼財經時事新聞分析,讚好hket Facebook 專版