同楊局長研究一下

副刊版 2018/10/11

分享:

唔曾聽過,竟有官員不遺餘力地想將自己地方的文化遺產盡快消滅。日前,教育局局長楊潤雄在電台節目表示,港人繼續以廣東話學中文,長遠會否失去優勢?仲問全世界邊個地方用廣東話學中文?佢又指未來中文發展勢以普通話為主,仲反問學生若於日常溝通、用語及生活都多用普通話,係咪會好啲呢?而佢嗰套「無見過→就可以研究一下唔要」嘅邏輯,更加令人「歎為觀止」。見佢對呢個課題咬住唔放,間中就陰啲陰啲攞出嚟講,好似唔做番啲嘢俾上頭睇唔罷休咁款,好,今日就孖佢研究下:

一、作為掌握一個城市教育命脈嘅最高領導人,衡量一種語言嘅價值,竟只以功能及功利層面考慮,係侮辱咗整個城市嘅教育質素、去向及發展。若其邏輯係「全世界邊個地方用廣東話學中文?→所以要放棄廣東話」嘅話,咁跟番佢呢個邏輯,我就有個問題喇:全世界邊個地方嘅教育局長,會無所不用其極叫自己城市嘅人放棄自己母語呢?我實在無響其他地方見過喎!

二、港人嘅語言及智商,足以同時掌握兼運用一種以上嘅語言,硬要港人一係普教中、一係粵教中,係無必要嘅二元對立做法。假設港人繼續用粵語會妨礙學習普通話,係睇小港人嘅能力及毫無邏輯兼根據嘅妄斷。唔該阿楊局長咪用自己個腦度港人之智慧。

三、港人亦非不講理者,既然楊局長擔心講廣東話會失去優勢,要轉頻道講普通話,係咪應以身作則?咁就唔該楊局長從今以後大小場合、日常溝通、用語及生活都全操普通話,為大家示範長遠優勢響邊?若有實證好處,到時吾等無理由不考慮吧?

咦,不過咁喎,我有啲擔心楊局長有無心機同我哋好長遠咁研究一下呢?事關當被問到,點解佢啲仔女讀國際學校又到外國升學嘅時候,佢話因為「唔想深入理解」、「懶啲揀咗個簡單方法」。嘩,一個連自己仔女嘅教育都話懶得去斟酌嘅人,我哋將成個城市嘅教育方向同決定交俾佢?!長遠嚟講,咁呢個人對香港嘅發展同優勢又會唔會有影響呢?

撰文 : 利嘉敏

欄名 : 攻關女子

緊貼財經時事新聞分析,讚好hket Facebook 專版