「小姐」中女

副刊版 2019/01/04

分享:

不僅男性,其實女性都怕那些發小姐脾氣的女人。即使貌美若天仙,一揦埋口面,容貌即時打個五折;若發小姐脾氣者已屆中年,擺出副「我唔鍾意!」之嘴臉、差在未嘟嘴揼地(千祈咪喎,阿姐!),那副面色一沉、憋氣黑你面之相格,那已不太緊致的面部肌肉再往下一拖,真係敷三塊面膜都補唔番。看在別人眼裏,中年之境仍那麼執着,亦肉酸也。

她們發脾氣的因由,大部分因為心未開、唔話得、唔笑得、唔玩得,故小小事就介意或不爽。發小姐脾氣者,嚴重的,朋友無個,輕度者,身旁極其量只有客氣的「相識」,難有深交知己。UC Berkeley心理學教授Dacher Keltner發現,真正深厚友誼的徵象和深化,是雙方互有good teasing(善意開玩笑,跟惡意bullying欺凌不同)。美國暢銷書《The Rules of People》作者Richard Templar亦指出:「People only tease you when they like you.」(喜歡你才跟你開善意玩笑)。我有班識於微時的老友,年輕時淘氣事做盡,長大後各有專業,有醫生、律師、銀行家等,但一見面,大家即「傻婆」、「衰婆」神嘩鬼叫地玩作一團。有人影相永遠失準,對方直罵:「影到咁鬼肉酸!作死呀你?!」罵和被罵者其實都不介意。有人有女初長成,擔心:「死啦,好驚有報應,阿女做埋我哋細個啲曳嘢!」我笑答:「唔使驚,一定會,有啲嘢要還嘅。」她回一句:「衰嘢!」彼此心裏坦蕩,加上感情深厚有默契,才能如此。

這樣的teasing,「小姐型」當然受不了,因她們會把人家的說話看成「話我/笑我/彈我」,骨子裏要在人前做完美無瑕的女王,怎可以被teased?郁啲就介懷者,誰會想跟她們深交?故友誼只限於客氣層面。若「小姐中女」遇上吾等大大咧咧、嘻哈、話鬼之你的「平民中女」,心火必氣得頂上眉頭矣。惟吾等平民中女亦不傻,根本不會俾麻煩友埋身,老老實實,人到中年皆有選擇,放個刁喬扭擰、小姐脾氣之友(乃麻煩友之「友」)在旁,咪即搵自己笨?﹗此等又呵又氹之「善舉」,留番其伴侶以無比愛心和包容去做好了。

撰文 : 利嘉敏

欄名 : 攻關女子

緊貼財經時事新聞分析,讚好hket Facebook 專版