潘源良音樂騷 二次創作諷時弊

行政人員版 04:00 2019/02/12

分享:

黛安同唔少香港人一樣,都覺得二次創作好盞鬼,最近收到風,殿堂級填詞人潘源良由原創玩到二次創作,今個星期五(15日)至星期日(17日),將會喺香港藝術中心壽臣劇院舉行4場「潘源良生炒廣東話之有辣有唔辣二次唱作川流音樂騷」。

黛安喺佢個facebook專頁留意到潘源良今次音樂騷嘅主題曲《香港製造》,係串燒咗Material Girl、半斤八兩、鬼馬雙星等多首金曲諷刺時弊,由剪短鋼筋、怪獸家長,唱到特首高官、大灣區融合,以至本地選舉嘅怪現象,聽到都覺得有趣!另外兒歌《叮噹》亦畀佢二次創作成《高官》,真係估佢唔到!

潘源良仲話,今次音樂會係希望睇下廣東話同大眾嘅生活、創作同表達方式可以擦出咩火花,黛安都好期待佢喺台上同觀眾嘅互動呀!

本文轉載自《晴報

聽完騷仲可憑票尾到冠名贊助嘅新餐廳「川流」,以8折優惠品嘗「有辣有唔辣」嘅川菜㖭!

撰文 : 黛安 消息特靈八卦公關

欄名 : 八卦名利場

緊貼財經時事新聞分析,讚好hket Facebook 專版