「起動傳承」社區運動大使計劃 體驗VR街跑兼行善

行政人員版 04:00 2019/03/21

分享:

就快夏天,又係時候減肥啦。黛安聽公關姊妹講,香港中華基督教青年會(YMCA)—賽馬會「起動傳承」社區運動大使計劃,除咗可邊做運動邊做善事外,最近仲自行開發咗新App《Mapperthon》和一款VR街跑遊戲《Mapperthon Runner VR》,等就算唔係運動愛好者都可一齊體驗!

姊妹話,呢套VR街跑遊戲用法好簡單,玩家只要戴上VR眼鏡,同喺腳上戴上專屬腳部感應器,就可感應到玩家跑步時嘅震動,街道嘅景色仲係各大香港地標,包括中環摩天輪、太空館、大埔墟火車博物館等,喺虛擬世界都可穿越港、九、新界共20個景點,保證大家會覺得親切,加上拎住操控桿,喺沿路執起有用嘅捐贈物資,用嚟捐贈畀有需要嘅社區人士,實行達到「常運動,傳承愛」。

遊戲會顯示玩家所消耗嘅卡路里,同已經跑過嘅距離。遊戲計分方法,係以玩家遊戲中經跑步所儲下嘅卡路里,最後將卡路里捐贈畀3組有需要人士,獲得最高捐贈分數嘅就係贏家!想試玩3月31日可以去鑽石山荷里活廣場嘅運動市集。

另外,手機App《Mapperthon》會顯示唔同義工計劃資料同資助狀態,用家先要揀選想捐贈嘅義工服務,再選擇即將進行嘅運動,包括跑步、單車、街舞同街頭健身等,開始紀錄運動時間同消耗卡路里,咁就得啦!

咁方便,又有意思,大家快啲去follow計劃嘅fb專頁啦!

本文轉載自《晴報

玩家戴上VR眼鏡、腳部感應和操控桿,就可以一路跑一路捐贈物資畀有需要人士啦!

《Mapperthon》App有卡路里兌換捐贈物資嘅功能。

撰文 : 黛安 消息特靈八卦公關

欄名 : 八卦名利場

緊貼財經時事新聞分析,讚好hket Facebook 專版