杭州酒家主廚 炮製正宗紅燒砂鍋魚頭 獲韓國瑜大讚

行政人員版 04:00 2019/03/22

分享:

正所謂「民以食為天」,美食可以話係大家嘅共同語言,連台灣高雄市長韓國瑜都咁講!黛安知道,韓市長今日訪港,必將掀起「韓風」,但原來此前早已同香港結緣,事關香港杭州酒家老闆兼主廚吳瑞康原來係「超級韓粉」,仲曾親自為韓市長下廚!吳師傅同黛安分享,韓市長原來最愛食醉蟹同紅燒砂鍋魚頭,消息傳出後,杭州酒家近排更多咗唔少台灣遊客專誠造訪!

曾獲米芝蓮一星嘅香港杭州酒家,老闆吳師傅舊年12月曾赴高雄進行美食交流,更親自為韓國瑜煮咗幾味道地杭州菜,好似有龍井蝦仁、紅燒砂鍋魚頭等,兩人仲合照留念,成為一時佳話,引嚟唔少傳媒報道,簡直稱得上係「香港之光」。

吳師傅同黛安分享,佢係一直好欣賞韓市長,話佢夠「接地氣」,當日見面,亦覺得韓市長為人隨和,毫無架子!韓市長同佢提起,自己媽媽係杭州蕭山人,最鍾意食媽媽煮嘅紅燒魚頭,又愛冬筍等食材,所以吳師傅特意為佢炮製拿手嘅紅燒砂鍋魚頭,仲有醉蟹等,韓市長都食到回味無窮!期間吳師傅仲送贈有300年歷史、私人收藏嘅財神像,希望高雄發大財咁話。

今次訪港,韓市長公務繁忙,未必能再次品嘗到吳師傅嘅佳餚;但黛安知道,接待過韓市長後,吳師傅獲當地傳媒大事報道,令佢喺台灣知名度大升,吸引唔少台灣旅客來「朝聖」,唔少人都羨慕佢同韓市長合照,再試埋連韓市長都愛嘅紅燒魚頭,更讚不絕口。而台灣客最愛嘅,仲有店內嘅紹興臭豆腐,無論係炸定係蒸,一樣受歡迎!

本文轉載自《晴報

吳瑞康師傅(左)親自下廚炮製佳餚,令韓國瑜(中)都讚不絕口。

紅燒砂鍋魚頭

撰文 : 黛安 消息特靈八卦公關

欄名 : 八卦名利場

緊貼財經時事新聞分析,讚好hket Facebook 專版