掃興人

副刊版 2019/05/17

分享:

好友相聚,七嘴八舌,大家平時各有各忙,難得相見,必然盡興。廿載情誼如何保鮮?除了性情、價值觀、待人接物相近是關鍵外,最重要是,彼等俱懂不掃他人之興。

最可恨的「掃興人」,是那些甫到飯局,即說:「不要叫那麼多(餸菜),我好飽。」吓?!你好飽,其他人唔使食?要大家就你一個?又或,其他人安排了飯局地點,掃興人之前無意見,但去到卻彈三彈四,「都唔係咁好食啫!」令安排者尷尬又難受。團體活動,最重要是開心相聚聯誼,你咁多批評,當自己係米芝蓮食評乎?近年,又有新品種掃興人出現,所謂「養生大師」是也,人家正把餸菜挾到嘴邊,偉論即連珠炮發:「唔好食咁多,好濕/毒/燥」、「茄子寒涼,少食為佳」……如此,豈非成枱餸無樣食得?掃興之極!

當然,掃興人類別之廣,不限食格。有人開生日party,大家開開心心之際,掃興人哭訴自己的工作委屈,搞到氣氛沉重,全部人注意力轉到她身上,連生日主角也要花時間上前安慰。這不僅是自我中心的行為,更是連基本社交禮儀都不曉得的沒知性表現。又或,大家相聚後拍照留倩影,人家相機已舉起,掃興人突然黑面說:「我唔想影。」大家都是成年人,難道要人又呵又𠱁「影啦、影啦」?不喜歡拍照或不想見到自己個樣,大可收到相後delete。人家肯放你入鏡頭,其實都是一種俾面,這個面,你拒絕後,就不要期望自己有mood後又可重拾,因為,這個世界不是圍繞着你去轉的。

友人說得很好:「我們成年人都有自己的脾性和偏好,但與朋友相聚時,就是因為份外珍惜情誼,所以會懂得在意不掃他人之興。」確實如此。我們後來都沒有興趣研究,究竟掃興人是自我中心,抑或有社交障礙,因為對於道不同的人,可免則免,盡量讓大家在平行時空、互不交織便好。當然,掃興人大多沒有自知之明,有反省能力大概不會搞成這樣,經常會問:「下次幾時?」眾中女在席上異口同聲說:「仲有下次?!咪搞!」老老實實,大家時間寶貴,難道會出嚟專誠俾人掃興同自己過唔去?面對掃興人,當然要曉得使出一招「太極雲手」,力保自己的寶貴時間。

撰文 : 利嘉敏

欄名 : 攻關女子

緊貼財經時事新聞分析,讚好hket Facebook 專版