「FLOWERS BY NAKED」來港 欣賞8大互動「花海」

行政人員版 04:00 2019/07/17

分享:

想影輯靚相?絕對無難度!黛安收到風,喺日本爆紅嘅「FLOWERS BY NAKED」虛擬實境互動藝術展系列,會喺今個星期六(20日)起,一連44日喺馬鞍山MOSTown新港城中心舉行「FLOWERS PIECES」繁花光影互動感官展。大家暑假唔使去戶外曬住影相啦,仲唔快啲約埋朋友一齊去影番輯唯美靚相呃下Like!

呢個展覽由媲美「光之建築魔法師」嘅日本互動光雕設計團隊「NAKED Inc.」負責策展,之前已經喺東京、京都、名古屋、沖繩等地方搞過巡迴展覽。今次喺香港搞呢個全球首個日本國外嘅展覽,當然唔少得「FLOWERS BY NAKED」8大最具標誌性嘅互動藝術裝置,好似以3D投影紅櫻同紀錄住「FLOWERS BY NAKED」故事嘅「BIG BOOK」、塊臉一靠近就會有花香撲鼻嘅「Cosmos」、同埋綻放10種唔同櫻花嘅「SAKURA WALL」等等。

今次展覽以綻放嘅花為設計主軸,結合光感、香氣同互動裝置等創新科技藝術,再糅合花道、和歌等多種日本傳統文化元素,畀大家360度欣賞大型唯美嘅花花世界。

MOSTown仲會喺指定日子舉行「FLOWERS PIECES」周末藝遊導賞團,有興趣嘅朋友可以由即日起,喺網上預約登記7月27日至9月1日嘅活動場次,費用全免。黛安已經約咗姊妹一齊去花花世界喇,你哋都唔好錯過呀!

本文轉載自《晴報

互動藝術裝置「OUSAI大櫻彩 2019」展現大片櫻花,唔使去日本都可以影到漫天櫻花紛飛嘅夢幻場景。

互動藝術裝置「OUSAI大櫻彩 2019」展現大片櫻花,唔使去日本都可以影到漫天櫻花紛飛嘅夢幻場景。

撰文 : 黛安 消息特靈八卦公關

欄名 : 八卦名利場

緊貼財經時事新聞分析,讚好hket Facebook 專版