塵世間最殘酷不過的事

副刊版 2019/07/19

分享:

當林鄭重申:「唔會出賣警隊嘅時候」,友人們紛紛七嘴八舌:「有無搞錯呀?!呢個時候仲向公眾講埋啲咁嘅嘢!係咪想火上加油呀?!」對我來說,她講出此話是最自然不過的事,沒有甚麼值得大驚小怪。

試想想,當一個人眾叛親離、由內至外都無晒真正朋友,圍着她的,全都是只有計算利益或虎視眈眈的敵人時,她會怎樣對待世上唯一跟她同一陣綫的「夥伴」?當然是不惜一切、在所不辭地「誓保」彼此友誼,皆因「你唔掂,我仲唔掂呀大佬!」試幻想一下,林鄭這個處境,若無埋這個唯一的朋友依靠,她將會落入何等境地?因此,反正得罪晒其他人,最在乎的只有唯一撑自己的朋友,表明心志才是求生本能。

觀乎林鄭目下局面,她可能會覺得,唯一拯救到佢嘅男人,唔係佢老公,而係聰聰,而事實上,去到今時今日,搞出個咁嘅爛攤子,彼此亦只能互相依靠。這種關係,一如金庸小說《神鵰俠侶》般:我倆不要理世俗的批評,只要彼此不離不棄便是;而我們看到的真實現在版也如是,娥姑姑有難求救,聰兒與眾弟兄會一如以往,奮力相救。

但wait!現在局面已發展到每次出動,無論哪一方都可能有人身安全的危險,惟姑姑卻仍躲在古墓裏慢條斯理地吩咐:「聰兒,你去吧!」然後,聰兒和弟兄們就為了這麼一個姑姑,押上所有去「併出一生癡」,矛頭自己擋、血自己流、殘局自己收拾,其實那口裏說的「不會出賣」,在現實境況中「已經出賣」了。假若將來有一天,有人驀然回首,發現自己與兄弟們一直毫無保留、豁晒出去、至死不渝守護住的姑姑,原來真身是李莫愁,那就是麈世間最殘酷不過的事了。

撰文 : 利嘉敏

欄名 : 攻關女子

緊貼財經時事新聞分析,讚好hket Facebook 專版