睇唔開之後

副刊版 2019/09/20

分享:

曾經有位中年舊女同事,開會時只因在場其他同事對她的看法持不同意見,竟邊發爛渣邊哭奪門而出。其他同事對她的「睇唔開」行為面面相覷了幾秒,然後繼續開心開會,無人諗過去安撫她,結果會議超額順利完成,會後齊齊飯聚。我邊觀察邊想:若那位舊同事知道自己憤恨離去,原來對其他人毫無相干,她會否自我檢討?又有否想到日後與同事撞口撞面時,自己是何等面懵?

若咁大個人,仍未能培養到最低限度的EQ去保持個人風範和風度,動不動就發爛渣拂袖離場,那出醜和面懵的只會是自己本人。這種現象近期亦經常在社交群組發生:因政見不同,會有人睇唔開而悻然絕交,我觀察到,若是情緒失控睇唔開的那種絕交,在社交群組的其他人和旁觀者,無一會有惋惜之情,太陽翌日依舊從東邊升起。

好友分享經歷:在相識三十年的舊同學群組中,有位女同學,據他形容:「明明後生時最溫柔、最清純、最傾倒男生的……氣質就像電影《那些年,我們一起追的女孩》的女主角一樣……但哎喲,『成熟』了之後竟然變成一位心腸惡毒的瘋婦般,天天在群組用最狠毒的形容詞咒罵看不順眼的陌生人,看得我們一眾男同學都暗自滴汗——真係作死!當年竟然鬼揞眼暗戀她?」後來,有位醫生舊同學實在難忍該女滿口昆蟲,以其工作崗位所目睹的相反情況反駁,孰料竟遭女的破口喪罵一輪,隨即悻悻地退出群組。

然而,大家有因她的消失而感惋惜嗎?精采部分還在後頭,眾人七嘴八舌表白鬆一口氣,有點終能六根清淨的愉快之餘,更有男同學馬上相約飯聚慶賀——賀乜呢?「慶祝我哋當年無一個追到佢、娶咗佢做老婆呀!真係諗起都一額汗呀,大佬!」他說。

結果翌日的慶祝飯局,全部舊同學男男女女皆踴躍出席。

撰文 : 利嘉敏

欄名 : 攻關女子

緊貼財經時事新聞分析,讚好hket Facebook 專版