ProVista Group手提咖啡機 獲電子業年度大獎

行政人員版 04:00 2019/10/17

分享:

電子業係香港工業非常重要嘅一環,每年兩次的電子產品展都吸引全球不少買家嚟參觀。黛安最鍾意睇新嘅潮流產品,今年最吸睛嘅係一部手提咖啡機,攞咗香港電子業商會(HKEIA)每年舉辦電子業獎嘅年度大獎Product of the Year。

黛安立即恭喜香港工業總會副主席Steve(莊子雄),佢亦係香港電子業總會主席,更係2007年香港青年工業家獎得獎人。

Steve非常厲害,佢哋公司(ProVista Group)今年憑呢部手提咖啡機攞到2019年嘅電子業產品年度大獎Product of the Year。原來已經係佢哋連續3年獲呢個大獎,十分唔簡單。要喺咁多參展作品中突圍而出,要攞獎已唔容易,何況係年度大獎,而且連續3年得獎,可以話破紀錄。

黛安聽佢講,好多歐美客戶開車返工、開車去旅行,佢自己都係。而開車時想飲咖啡,但卻未必遇到油站或小食亭。即使有手提咖啡機,水亦唔夠熱,沖出嚟嘅咖啡質素就大打折扣。

Steve公司主要業務之一,係生產車用同戶外用電子產品,佢組合咗一個意大利、荷蘭、澳洲、香港、內地人才同咖啡專家嘅團隊去做研發。佢仲即時沖咗杯畀黛安飲,成個過程同一般免提咖啡機睇落無分別,卻背後大有玄機。由於用咗鋰電池,又可接駁上汽車charge電,所以可以煲水,仲好快。佢話Espresso最佳溫度係89度,但喺沖咖啡過程中將會流失一些溫度,所以佢哋設定熱水溫度喺92度,而沖完嘅Espresso喺1分鐘後仍留有3mm的泡先叫做完美。黛安試飲,覺得好熱好香口,抵讚。佢哋仲提供一個可以畀顧客自己放自己咖啡粉嘅capsule,慳錢兼可隨時享受自己喜好嘅口味。

Steve話得獎都係要多得公司嘅設計團隊,同埋R&D部門,不斷推陳出新,先至做到。

香港電子業商會設立電子業獎嘅目的係提升優秀電子產品的創新和技術形象,激發電子行業嘅創造力,藉此獎勵在設計和技術領域生產新產品公司。

本文轉載自《晴報

ProVista Group連續3年獲香港電子業商會最高殊榮年度大獎Product of the Year,另兩款產品,「便攜藥盒」獲Gold Winner,而「便攜式太陽能移動電源」都獲EIA Winner,成大贏家。

Steve(右2)和由不同地方嘅專家組成嘅研發團隊介紹產品。

撰文 : 黛安 消息特靈八卦公關

欄名 : 八卦名利場

緊貼財經時事新聞分析,讚好hket Facebook 專版