4港產小畫家 奪國際繪畫大獎

行政人員版 04:00 2019/10/23

分享:

黛安覺得香港好多小朋友都有藝術天份,最近聽公關姊妹講,喺希臘「地中海國際兒童藝術大賽2019」中,嚟自香港、只得5歲嘅陳溥治,就擊敗近20個國家及地區、3,258幅4至18歲兒童及青年藝術家嘅作品,喺幼兒組奪得「全球冠軍」嘅最高殊榮,仲創下自比賽6年來,首位及最年輕嘅中國及香港冠軍得獎紀錄。

原來溥治由兩歲起就跟媽媽學畫,今次得獎作品《我要高飛- I Can Fly》,係描繪一班唔同膚色及國家嘅小朋友帶領各種小動物,不斷努力追尋自己夢想,聽落都覺得好有童真兼勵志。另外,9歲嘅陳永治同8歲嘅陳政亨,亦雙雙勇奪小學組「全球冠軍」最高殊榮,仲有年僅3歲嘅葉柏淳亦喺幼兒組奪得「全球亞軍」。呢4位小畫家非常厲害,更為港爭光,值得鼓掌。

早前佢哋應邀出席希臘駐港總領事館舉行嘅頒獎典禮及慶祝交流會,從希臘駐港總領事馬洛科斯手上,接過大會頒發嘅獎狀及獎牌。總領事先生對佢哋年紀輕輕就創下佳績,表示高興同驕傲,仲讚佢哋擔當咗香港同希臘之間藝術文化交流嘅大使及橋樑。

本文轉載自《晴報

4位小畫家嘅得獎作品,將喺希臘伯納詩塔基斯文化博物館同大會官網展出。

撰文 : 黛安 消息特靈八卦公關

欄名 : 八卦名利場

緊貼財經時事新聞分析,讚好hket Facebook 專版