學沖港式奶茶秘技 同Bare Bears相聚昂坪度聖誕

行政人員版 04:00 2019/11/18

分享:

最近朋友介紹《We Bare Bears》呢部卡通片畀黛安睇,睇完都覺得入面3位熊熊主角好可愛。點知聽公關姊妹講,昂坪360會聯同We Bare Bears喺今個星期四(21日)至明年1月5日期間,舉行「熊熊之約定-聖誕篇」,到時老大棕熊Grizzly、二哥熊貓Panda及三弟北極熊Ice Bear,就會嚟到昂坪360旅遊,同大家度佳節!

黛安仲收到風,喺昂坪市集嘅圓形廣場會化身成冰天雪地,除咗有3米高聖誕樹之餘,仲有融合聖誕元素嘅經典港式奶茶杯及禮物旋轉木馬,兩大打卡位,可以盡情同熊熊主角影多啲節日靚相啦。

昂坪市集仲設有全港首個We Bare Bears「至熊打卡館」,內設5大夢幻光影打卡熱點,好似熊熊纜車霓虹燈、We Bare Bears傳統聖誕花圈、熊熊光影簾、熊熊繁花隧道及熊抱雪花光影站;而館旁仲有熊熊氣球裝置,聽講呢個氣球陣係由世界氣球大賽冠軍香港氣球師彭思泰設計㗎。

到時大家打完卡,記得去參加「熊熊聖誕手工輕食教室」,試吓手工古早味糖蔥餅;場內仲有奶茶工作坊,由「香港金茶王」陳子平師傅親自傳授沖奶茶秘訣!聖誕節又點少得朱古力呢,去另一邊廂嘅朱古力工作坊,可以親手製作熊熊造型朱古力,送畀朋友夠晒窩心。

咁多精采活動,快啲約埋朋友一齊去留倩影,歡渡佳節啦。

本文轉載自《晴報

Grizzly、Panda及Ice Bear會現身We Bare Bears熊抱見面會,相約大家喺聖誕節及新年假期見面呀。

撰文 : 黛安 消息特靈八卦公關

欄名 : 八卦名利場

緊貼財經時事新聞分析,讚好hket Facebook 專版