愉景新城彈床樂園 一家大細跳上雲朵

行政人員版 04:00 2019/11/18

分享:

藍天白雲係人都鍾意,有無諗過仲可以跳上雲中玩呢?唔係天馬行空㗎!黛安知道,愉景新城今個月30日起,至明年1月5日聖誕新年期間,會有一個全港首個佔地5,500呎嘅《彈彈雲公園Puffy Park》,將「雲朵」主題同巨型彈床結合,等大家喺糅合創意同美感嘅白色遊樂天堂中跳離煩囂,釋放壓力,顛覆遊樂場嘅新體驗!

黛安聽公關姊妹講,今次彈彈雲公園集齊藝術同歡樂元素於一身,例如有首個大型「彈彈雲」藝術裝置,安排咗3個高矮不一嘅「彈彈雲」,以堅韌牢固嘅PVDF外膜專利物料製成,四周仲有唔少海綿軟墊加固作緩衝,安全性極高,大人細路都啱玩!此外,亦有立體感爆燈、由上千條軟棒組成嘅「百變記憶雲」,大家可以喺呢啲「浮動中」嘅雲層穿梭,仲可以透過推動軟棒製作屬於你嘅倒模足迹!另外,場內仲有「夢幻泡泡屋」、「琉璃水雲間」等,無論係去玩定打卡都一流啦!

本文轉載自《晴報

撰文 : 黛安 消息特靈八卦公關

欄名 : 八卦名利場

緊貼財經時事新聞分析,讚好hket Facebook 專版