睇巨型水晶球感受浪漫 歐陸聖誕村「賞雪」

行政人員版 04:00 2019/12/13

分享:

仲有兩個星期就到聖誕節,最近黛安少不免同朋友聚會,行經唔同商場都見到有好多靚靚布置,兼且有遊戲玩,啱晒一家大細去打卡啦。

黛安好欣賞ELEMENTS圓方,今年以歐洲鐘樓為藍本,由即日起至明年1月1日,化身成為「歐陸夢幻聖誕村」,場內有7米高嘅「聖誕奇妙鐘樓」,每日定時上演聖誕老人舞蹈音樂劇場,場景更設有巨型飄雪水晶球及雪地,等大家可欣賞巨型水晶球內雪花紛飛嘅浪漫情景。同場仲設有拍照區,畀大家製作個人化年曆。黛安就最鍾意佢嘅互動雪地,除咗可體驗踢雪球嘅樂趣,仲可以同可愛雪人一齊影相!

如果鍾意童話甜夢感覺嘅朋友,就唔可以錯過YOHO MALL嘅「擁『泡』聖誕」主題活動,佢哋今年以童話、華麗、甜蜜同繽紛4大元素打造咗6大場景,包括情侶及閨密必到嘅「BUBBLELAND」、6米高「旋轉木馬白日夢」,及大細朋友都鍾意嘅「毛毛熊胖您行」,同2.5米高嘅玩具熊合照。商場仲推出AR隨身寵物拍攝遊戲,只要以手機掃描場內裝置,就可與畫面得意小動物拍照,畀訪客一嘗與「寵物」暢遊聖誕景點嘅喜悅喇。

去開荃灣,即日起至明年1月2日,可以去荃灣廣場5樓平台參觀一條13米長嘅「浪漫雪花隧道」,大家可以先到「光影霓虹聖誕樹」旁邊打卡,再同兩個1.7米高嘅雪人抱抱,最後與愛侶或閨密去4米高嘅「幸福摩天輪」影甜蜜合照,咁就最Sweet啦。

本文轉載自《晴報

ELEMENTS圓方聖誕村內設有巨型飄雪水晶球,讓大家在悠揚鐘聲下享受白色聖誕。

YOHO MALL今年以4對萌爆的人氣動物,如小狗、小貓、豬仔及草泥馬打造不一樣的「旋轉木馬白日夢」。

撰文 : 黛安 消息特靈八卦公關

欄名 : 八卦名利場

緊貼財經時事新聞分析,讚好hket Facebook 專版