義工隊分享「清真」團年盆菜 迪士尼鼓勵文化共融

行政人員版 04:00 2020/01/24

分享:

香港係多元及共融社會,少數族裔人士亦係社會一分子,不過對於我哋嘅傳統文化,佢哋未必認識好深。鼠年將至,黛安知道米奇老鼠同米妮老鼠就連同迪士尼義工隊,齊齊走入東涌社區,提早同超過60位嚟自鄰舍輔導會嘅本地同少數族裔朋友食團年飯,畀唔同文化背景嘅居民一齊分享新年歡樂、鼓勵大家互相了解彼此嘅文化。

中國人過年嘅傳統習俗要一家團聚,齊齊整整食餐團年飯。香港迪士尼樂園度假區餐飲營運總監黃慶龍話,今次難得可以善用餐飲部團隊嘅專長同樂園嘅專業設施,包括不同文化背景的廚師,共同研究食材及烹調方法,又喺樂園具清真認證嘅廚房入面準備食物,充分表現多元共融嘅文化。黛安知道,樂園今次特別炮製的「清真盆菜」,沿用香港傳統圍村盆菜,食材層層疊擺放,口味濃郁豐富,但食材及調味都嚴格選用符合規範嘅清真食品,同時亦以其他肉類取代盆菜中常見嘅豬肉,取喜慶嘅好意頭「盆滿缽滿」,祝願大家「豐衣足食」。

而巴基斯坦裔嘅中一生顏海欣(Navaid Seherish)同黛安講,佢哋一家5口住喺香港11年,今次係第一次食團年飯,「以前聽本地同學提到食團年飯,以為係一般嘅節日大餐,原來傳統團年飯入面有咁多有趣嘅地方,好似蠔豉代表『好市』,取其『好意頭』,呢啲文化喺我哋家鄉就好少見。」

至於讀小三、喺香港土生土長嘅楊柏棆亦係第一次享用清真團年盆菜,佢話清真盆菜同傳統盆菜差不多,一樣咁豐富同美味。柏棆嘅媽媽陳女士就話,希望佢可以透過今次團年飯,學習到「和而不同」嘅意義。

本文轉載自《晴報

60位嚟自鄰舍輔導會嘅本地同少數族裔朋友,一齊開心共聚分享「清真」團年盆菜。

「清真」團年盆菜由樂園嘅廚師炮製,米奇同米妮都有出席呢餐咁特別嘅團年飯。

撰文 : 黛安 消息特靈八卦公關

欄名 : 八卦名利場

緊貼財經時事新聞分析,讚好hket Facebook 專版