中銀$1300萬捐公益金助基層 建造業「關愛行動」支援工友

行政人員版 04:00 2020/02/18

分享:

受新冠肺炎疫情影響,唔少行業都受打擊,好似建造業前綫工友,好多都係日薪制,真係「手停口停」。黛安知道建造業議會正連同業界發起「建造業抗疫關愛行動」,為受疫情影響嘅註冊工友,提供支援。

如工友不幸感染新冠肺炎,住院及病假期間每人每日獲500元生活津貼,每人最多可獲10萬元。萬一有工友須強制隔離,關愛行動亦會提供每人每日300元生活津貼,每人最多可獲4,200元。善款來源包括地產商、承建商及分包商等。

今次有賴一班有心人促成,包括建造業議會主席陳家駒、立法會議員石禮謙及香港建造商會會長陳修杰等,佢哋都好關心工友嘅困境;大家亦可致電2100 9000查詢詳情。

黛安仲收到風,中銀都捐助咗公益金1,300萬元,用嚟支援基層同醫護人員等,公益金已準備咗5萬個「愛心防疫包」,包括口罩、搓手液等,稍後將分派畀弱勢社群;另會送贈9萬份個人防疫用品畀醫管局全體人員。同時會撥款提供「疫症經濟援助」,支援確診嘅香港居民及其家庭。而廠商會亦撥咗近50萬元,同公院員工餐廳合作,向醫護送上靚湯、糖水等,慰勞佢哋嘅辛勞。

本文轉載自《晴報

撰文 : 黛安 消息特靈八卦公關

欄名 : 八卦名利場

緊貼財經時事新聞分析,讚好hket Facebook 專版