「亞參雞飯」進駐中環 歎滋味海南雞飯

行政人員版 04:00 2020/02/24

分享:

近排大家都注重防疫,出門去旅行難免減少,但有啲地方嘅美食,真係令人念念不忘,好似人氣美食「海南雞飯」,就係唔少人嘅最愛。黛安收到風,主打星、馬同多款東南亞特色美食嘅餐廳「亞參雞飯」最近落戶中環,大家留喺香港都品嘗到當地美食啦!

黛安都係海南雞飯嘅粉絲,最近就去咗「亞參雞飯」試食餐廳嘅王牌推介「亞參去骨海南雞飯」,知道佢哋廚師選用雞味特重嘅三黃雞,烹調火喉亦控制得啱啱好,雞肉入口又軟滑又多汁,真係好好食。至於油飯,係先拌入炒香嘅班蘭葉同香茅,再以濃雞湯煨煮吸盡雞湯精華,成為呢個王牌嘅亮點;附送嘅雞湯就用雞隻浸煮慢熬,絕無添加額外調味,仲加入冬瓜嚟解膩,滋味同貼心度都滿分。

「亞參雞飯」仲有「新加坡喇沙米綫」、「檳城蝦麵」同「巴東牛肉飯」等南洋美食,一樣咁正!如想豐富啲就可點「亞參豬手」、「馬拉盞怡保芽菜」同朋友一齊分享。食完正餐再配南洋特飲「馬來拉茶」、「南洋咖啡」簡直係最佳享受,大家快啲去試吓啦!

本文轉載自《晴報

撰文 : 黛安 消息特靈八卦公關

欄名 : 八卦名利場

緊貼財經時事新聞分析,讚好hket Facebook 專版