劇烈運動≠健康

副刊版 2020/03/09

分享:

美國樂壇天后麥當娜,六十一歲了,仍不停巡迴演出,日跳夜跳,以為自己是「鐵打」的。結果,多年下來,五勞七傷,狀態及身手日比日差,終於在巴黎開《Madame X》演唱會時失足受傷,當場爆喊。

喊,一則是痛入心肺,另一是無法不承認自己已老化的現實。

一般人,以為運動員、球員、騎師、龍虎武師、武打巨星(成龍、甄子丹、李連杰……)、舞蹈藝員、健身教練……全部fit到震,一係周身肌肉,一係半吋脂肪都無。表演時,普通人做不到的高難度動作,佢哋全部搞掂,像超人般。

當然有天份!但更重要,是日日狂操,將體能極限推到崩潰邊緣。

久而久之,恍似一部跑車,日日踩盡,你話嘞,零件幾傷?亦幾快全部老化「打柴」!

我肥碌認識的人(不算朋友)中,有滿身是鋼螺絲的騎師、腰椎重創的健身教練、膝蓋四十歲已報廢的球員、接近癱瘓的龍虎武師……

為乜佢哋搞成咁?一為搵食,二為英雄感!事實,在運動場中、舞台上、賽道上、電影中能光芒四射,嗰種滿足感,絕非其他工種可取代。

十零二十歲出頭,初生之犢,青春無限,當然可以日操夜操。如此生涯,三十歲後期,身體即發出各種訊號:「老友,夠嘞!」

但掌聲及歡呼聲太吸引了,存在價值亦蓋過一切,於是,惟有加碼死操甚至開始服「藥」(小弟也見不少!)。從此,無回頭了。

麥當娜在舞台上倒下,乃千萬真實現實例子之一矣。

撰文 : 曾智華

欄名 : 肥碌出馬

緊貼財經時事新聞分析,讚好hket Facebook 專版