幫襯?缺一不可!

副刊版 2020/03/12

分享:

上周末早餐過後,見到肥妹老婆及排骨仔懶洋洋在家,無所事事。我肥碌提議:「喂喂,無謂日日在家坐監吖,不如搵個新地方午餐。老婆大人,有無提議呢?」

「有,不過你唔慌有興趣噃。由三個年輕人經營的小型西餐館,強項炮製意粉,只有二十四個位,經常爆。入門規定:一、戴口罩;二、量體溫;三、踏消毒地氈。聲明三項必須做齊,缺一不可!你咁鬼腌尖,肯定嫌麻煩無興趣啦!」

「哈,唔係噃,咁煩都滿座,咁環境都唔使執笠,一定有料到嘅,訂位啦!」

十二點摸去。嘩,都幾難搵,小店名《Hidden Kitchen》,果真收收埋埋在紅磡北拱街八號樓上單位,招牌都唔覺有。

入到去,果然滿座,全部十八至三十歲年輕人,小弟呢位阿叔,有點「異類」感覺。

好,一於點招牌午餐:廚師沙律、紅酒燉牛面肉扁意粉、葡萄凍茶(九十五元)。

老虎乸及排骨仔分別主菜點泰式日本無激素雞肉意大利粉及香草醬煙三文魚海蝦扁意粉。

此店客路斯文,人人喁喁細語絕不喧嘩,望望四周落地玻璃,有種舒泰悠閒之感。

講到食,完美出品,一定要有齊色、香、味。上菜,面前的燉牛面肉扁意粉,論賣相,贏晒!其他香及味,九十五分,難怪以此為鎮店之作。邊歎邊望三位年輕人全情投入工作,這種專業態度,真係做乜都會成功的!

紅酒燉牛面肉扁意粉(專欄作家提供圖片)

撰文 : 曾智華

欄名 : 肥碌出馬

緊貼財經時事新聞分析,讚好hket Facebook 專版