消委/競委開工喇!

副刊版 2020/03/16

分享:

消費者,十之八九似我肥碌一樣,覺得某啲行業好離譜,擺明玩壟斷,但因有天文數字資金請無數「師爺」度蹺,總之,你就係奈佢唔何,告佢唔入。

例如油商。真犀利,個個集團定價幾乎百分百相同,你話無默契?當我傻的嗎?

不過,政府搞到成身汗,都「無法」改變現狀。

好啦,美其名保護消費者,創立兩個會啦:一為消委會,一為競委會。表面睇,兩個皆具法例賦予權力。

不過,唉,你知我知,兩個會,根本只屬「假牙老虎」,即係,咬「軟嘢」(豆腐?)還可以,咬「硬嘢」(大鱷?),根本無牙力,間中,連講下都唔敢。

消費者之中,車主為最谷爆一群,因比起其他城市(凡曾移民歐美澳加者,必知),香港油價天咁高。兼且,加快減慢。

傳媒N年又調查又投訴問點解?答曰:「香港地租貴、人工貴、稅貴……乜都貴;而油價成本,只屬眾多成本其中之一,故此,原油跌價,並不代表汽油可以按比例減價!」

真係佢講晒,咁,加價嗰陣時呢?

上周,全球油價大戰,俄羅斯及沙特阿拉伯趁美國病,攞美國命,意慾一舉「殲滅」美國多年來以頁岩油取代原油「奸計」,睇準美國經濟受疫情打擊重傷,再插一刀,將原油價格推回二十年前水位,以大出血價封殺已投入巨額資金開發的頁岩油公司。嗱嗱嗱,油價突然平成咁,香港汽油有無勁減?無呀喂!

咁,消委及競委,仲唔「做嘢」?

撰文 : 曾智華

欄名 : 肥碌出馬

緊貼財經時事新聞分析,讚好hket Facebook 專版