正牌大喊十

副刊版 2020/03/17

分享:

世界有好多類人,有的「天跌落嚟當被冚」(我肥碌應屬此類);有的凡事超級憂慮,乜都「船頭驚鬼、船尾驚賊」。呢呢,由去年六月開始,後一類人,真真無好日子過,直至今天,仍活在惶恐不安中。

我最怕呢班友仔不停傳片俾我睇,無論乜嘢顏色陣營,總之講到天快冧咁款。不少片,傳出的時間為凌晨,顯示佢哋真係驚到無覺好瞓。

好啦,踏入今年,班「大喊十」仍然無得收工,繼續散播超級焦慮「病毒」,每一分每一秒都困在家中「驚」,真係無病無痛都會中硬抑鬱症。天天活在恐慌中,簡直防疫防到精神崩潰兼失控。

小弟家居樓下,也有一個大喊十司機「A仔」,朝朝見到我就散播悲觀情緒。去年六月至十二月,猛問:「碌Sir,香港死得啦,究竟幾時收科?」

真係你問我,我問邊個?我則生活如常。

好啦,到咗今年,佢又朝朝問:「碌Sir,呢鋪肺炎大災難啊,將會點發展啊?有無機會停啊?會否全球大爆發啊?」

哈哈,又係你問我,我問邊個?連美國總統「牙擦特」及世衛總幹事譚德塞都成嚿雲咁款啦!

上周五,A仔又嚟:「慘啊慘啊,我揸的所有股全部跌到一仆一碌,唔見好多錢呀?幾時有機會回升見家鄉呀?碌Sir。」

呢類超級大喊十,永遠只見到事情悲觀一面。我肥碌則相反,個市唔冧,邊有機會掃貨呀?新冠肺炎,亦是給世人一次「平安得太久」的當頭棒喝,扑醒之後,起碼知道自己幾渺小。

撰文 : 曾智華

欄名 : 肥碌出馬

緊貼財經時事新聞分析,讚好hket Facebook 專版