拍烏蠅 vs 一位難求

副刊版 2020/03/18

分享:

平日大量香港人「宅」在家,當然無聊,於是,手機片段互傳,不少睇咗 N+N咁多次。

其中一條,令我肥碌心實,為一間空空如也的食肆,店主:「快救命!否則被病毒殺死前,我同老婆經已蝕死!」

有悲情、有幽默。事實,近兩月收到大量經營飲食老友來訊:「碌Sir,頂唔順,要執笠/暫停喇!希望有日江湖再見啦!」

真是極度悲壯。慘在,我又可以幫得幾多?真無奈。不過,深信有料者,再遇反彈市時,必定能夠一飛又沖天去。

究竟全香港的飲食業,是否真的非常不堪、水深火熱?就小弟所見,Yes and No!

親身體驗,過去幾個周末,凡到新界,無論大埔、上水、元朗、粉嶺、西貢……以至郊野公園,皆見人山人海。而附近食肆,不少也爆晒棚。單咁睇,邊個話飲食業死得?

死,只是大部分,但有小部分則做到唔停手,原因大家齊來分析可也。

學者老友蔡子強,上周末與大班朋友往接陳健民教授出獄,之後,拉隊去西貢海邊放放風,諗住無乜人啩?點知,又是人頭湧湧,海鮮酒家所有戶外枱,全部坐滿。

咦?乜唔係人人應該留家「避毒」嘅咩?

我肥碌上周六同樣時間,拖埋肥妹老婆、肥女B及排骨B去九龍城食個「天倫午餐」。喂喂喂,講都唔信,通街double park,行人處處,恍似疫情已過,真誇張。

走入獅子石道「地茂館」歎及第粥雲吞麵,哎吔吔,爆到一位難求呀老友!

撰文 : 曾智華

欄名 : 肥碌出馬

緊貼財經時事新聞分析,讚好hket Facebook 專版