假如我是應家柏

副刊版 2020/03/20

分享:

香港是國際大都會,不少頂級機構CEO,當然行能者居之制度,歡迎國際高手出任,因能直接令香港競爭力飛升。

香港有三位「非純商業機構」行政總裁,全部年薪加花紅是特首林鄭月娥(香港最大權力!)的數倍:一、馬會行政總裁應家柏;二、港交所總裁李小加;三、金管局總裁余偉文。

這世界無「免費午餐」,收得天文數字薪酬,當然全港市民包括各界精英日日𥄫住你的表現,究竟值唔值先。

今日講講馬會行政總裁應家柏,此君來自德國。歷年表現,由國際馬壇至本港馬圈,皆公認是超級人才,屬歷任CEO中武功最高者。

單單今次新冠肺炎來襲,亦見其功力,頂住各方壓迫(包括政府!),堅持馬照跑。這個,對香港的政治經濟形象,以至庫房及慈善貢獻,知情者,必領略其貢獻有多大。

不過,當我肥碌雞蛋裏挑骨頭啦,仍認為老應可以做更多,令賽馬事業在逆境中企穩。

封場作賽,無可厚非,雖令每次賽馬無咗幾萬份直接間接工作。

不過,眾所周知,跑馬,就要睇馬經。早前,馬會停晒投注站及電話投注,立時令大量年長馬迷「投注無門」。無得玩,當然唔刨馬經。於是,令馬經出版業進入「冰河時期」,減稿費、裁員、減印刷量,甚至考慮執笠。

馬經令賽馬興旺,應家柏肯定理解。既然政府對各行各業皆伸出援手,咁,老應作為CEO,豈可不諗諗點令馬經業得以生存?

將投注額千分之一作過渡性津貼,已即掂!

撰文 : 曾智華

欄名 : 肥碌出馬

緊貼財經時事新聞分析,讚好hket Facebook 專版