唔好食唔收錢

副刊版 2020/03/23

分享:

嘩,邊個咁大口氣?

正是高檔上海菜「十里洋場」的行政總廚欒華宏是也。佢老哥講得出,正正顯示信心爆棚。

話說,早前馬主老友F哥「無端端」贏咗場頭馬,高興到震,當然要分享快樂,故call齊一圍為食鬼開餐威一威先。

點解話佢「無端端」?因隻馬今季七歲,已老老哋,三月前已跑咗八次,七次有獎金,兼且1W3P,正常馬主,理應心滿意足,收晒貨,俾佢唞暑啦!

但到三月一日,練馬師認為隻馬個form仍好好,於是安排再出。

馬迷皆知,一隻「老馬」,六個月內默默咁跑,八次咁多,仲出,機會肯定無乜喎,應該出來遊馬河減分啦!雖然配上華籍騎師一哥何澤堯,都無馬迷會寄望太高。

哈哈,點知,開跑前,何澤堯突然唔舒服,要臨時拉伕,搵另一牌仔(見習騎師)潘明輝頂上。潘仔摸都未摸過隻馬,做「臨記」,更加邊有人覺得佢有機會呀!於是,賠率是四十二倍大冷。

結果,開閘!真神奇,講都唔信,跑千四米,隻馬跑開後上的,今場竟然由頭放到尾,仲要Win埋,創出不可能的「傳奇」,收八十幾萬元獎金!

一眾老友立時食神降臨,由F哥拉大隊去「十里洋場」歎高檔上海菜。

全晚個個興奮,水花四濺(無病毒,唔怕!),食過乜,無人完全記得。

我肥碌呢,深印腦海的,正是「上海酒糟蒸白鱔」。單單此一味,已值欒大廚牙擦擦了!

上海酒糟蒸白鱔(專欄作家提供圖片)

撰文 : 曾智華

欄名 : 肥碌出馬

緊貼財經時事新聞分析,讚好hket Facebook 專版