入境處模範公務員

副刊版 2020/03/25

分享:

前天早上,老虎乸走入我肥碌(書、電視、睡)房,下旨:「你啊,唔好成日只識彈人啦,好嘅就要讚下,知無?尤其是公職人員,俾多啲鼓勵!」

大人有命,豈敢不從?

乜事呢?事緣,佢二月份約期換身份證,日子本定二月二十四日,規例可以一拖四(兩位長者及兩位殘疾人士),所以,約期時就報埋為夫及外母大人兩位。

點知,新冠肺炎殺到,入境處唔提供服務,無符。結果,復工後,再約,定三月二十三日(即前日)。哈,真係天意大整蠱,結果,上周六,特首又宣布政府非緊急服務再停。講時為周六,咁,即係點呢?撞正假期,唔知問邊個,搞到肥妹老婆蟻咬咁聲。

終於,周日黃昏電話響起,原來是入境處來電。咦,乜星期日都辦公咁勤力!

由此證明,唔係所有公務員只按章工作及心態上「做又三十六,唔做又三十六」的。

「曾太太,好抱歉!因周一(三月二十三日)政府停咗非緊急服務,所以,特別通知你,明早唔好上嚟換身份證嘞!(語調誠懇)。稍後我哋恢復服務後,你可在整個換證期間(即2022年前),任何時間帶同長者上嚟辦理手續,毋須再預約。」

「多謝通知!」老婆大人以禮相待回應。

「謝謝你諒解及非常抱歉。老人家下次來,如不用坐輪椅,可在登打士街正門進入!」

結果,「諒解」及「抱歉」分別講咗兩次,再關心埋你屋企的長者(即係我!)。

咁好禮貌嘅公務員,真是入境處寶貝招牌啊!

撰文 : 曾智華

欄名 : 肥碌出馬

緊貼財經時事新聞分析,讚好hket Facebook 專版