咪問住,隔咗先!

副刊版 2020/03/31

分享:

明白嘅明白嘅,今次無人鬧爆政府嘞!雖則「防疫隔離蛋糕」完全未焗熱就監粗出台,搞到慣性守法的市民倒瀉籮蟹七國咁亂。但,無法啦,總之萬眾一心抗疫至上!

上周五開始一直到周六及周日,我肥碌手機所有群組都熱鬧過巴西嘉年華(仲有無呢項活動呢?),人人爭住舉手發問。問邊個?當然係大家以為佢哋會「識路」的政府高官、刑事大狀、執法阿Sir等等啦!

問呀問之下,吓?乜以上三大類人,根本一嚿雲!遇到刁鑽少少、深層次少少,特別少少的案例,全部唔識答。

點解立法會咁重要?正是凡政府推出新法例,必須先在內部幾上幾落,由負責的政策局加律政署專家反覆將一切可能性列出,保證無漏洞,才掟上立法會。

去到立法會,不同界別代表及不同政見議員,當然從N個角度猛鋤,然後,才投票通過。

整個過程,真似用放大鏡甚至顯微鏡去「雞蛋裏挑骨頭」!所以,辯論時已大部分市民會明白立法原意及帶來的效果。

不過,間中政府須按時勢作「緊急立法」。呢類情況,當然無可能深思熟慮,一二三「去咗先」。如此,肯定面對全方位挑戰。

今次的《預防及控制疾病(禁止群眾聚集)規例》,也是嗱嗱臨上馬,之前,政府高層及執法者根本無機會考慮晒所有將會出現的問題,故只能見步行步。

有市民恐怕誤墮法網或被「濫捕」而要搞清一切,合理。

我肥碌又點睇?「咪問住,隔咗先!」情勢緊急也。

撰文 : 曾智華

欄名 : 肥碌出馬

緊貼財經時事新聞分析,讚好hket Facebook 專版