「我愛」張竹君

副刊版 2020/04/01

分享:

今日標題「我愛」兩字為乜要加引號?因為,我肥碌都幾肯定,「我」字,已足可代表絕大部分香港市民的心聲,因大家都對衞生署衞生防護中心傳染病處主任張竹君醫生,有一份由衷敬愛之心。

正所謂公道自在人心,公職人員民望高低,當然有緣有故。

張竹君及港大微生物學系講座教授袁國勇,唔使做民意調查嘞,民心肯定百分百支持。總之,你叫我做乜就做乜啦!

若果無呢幾十日的四點半記者招待會,小弟就唔會對張竹君咁深印象。形容佢,可用八個字——談吐得體、溫婉專業。說話時氣定神閒,不慍不火。解說政策清晰透明,容易理解。這樣一個人物,正是香港人長期希望見到的公職人員典範。

再講一次,我完全唔識張竹君醫生,在任香港電台時亦未交過手。只是,過去兩月,的確有眼前一亮感覺。

尤其,前日招待會,有記者心水清,指出佢已超過五十天無放過假,故有少少擔心其身體健康。

如此情況,一般打工仔甚至高官都會:一、乘機呻下自己工作辛苦;二、突出自己有幾咁勤力,跑贏同儕。

哈,好一個張竹君,完全無上述兩點「正常反應」。倒轉,非常謙恭地話:「因為你哋見到我啫,其實,我哋衞生署所有人,包括署長、總監......甚至大家見唔到的同事,上班時間都比我長!」

何其得體又有風度!不但市民聽到窩心,相信,所有衞生署仝人都錫晒張竹君。

疫情過後,有請張醫生立即開「公職人員形象訓練」!

撰文 : 曾智華

欄名 : 肥碌出馬

緊貼財經時事新聞分析,讚好hket Facebook 專版