Johnny「宅」出正歌

副刊版 2020/04/02

分享:

上周,「美女教授」利嘉敏在專欄介紹南佛羅里達大學人類老化學權威Soomi Lee研究,我肥碌一睇,拍案而起:「哎吔吔,講緊我呀!」

Lee教授指,防止腦部退化,必要令自己生活「多姿多彩」!

過去大半年,身邊不少人煩躁到震,日日搵人鬧。更甚,今年開始,慘遇疫情,更情緒不穩,呆在家中看世界,怎不事事唔順眼?

嗱,小弟無叫大家通街走呀!不過,就算大部分時間在家,都可以策劃多樣化(diversity)、充滿變化(change)及令人更高主動性(active)活動的。點搞?有個好例子。八十年代冠軍民歌樂隊D'Spectacles歌手Johnny,正是表表者。

佢日常返工後,就「宅」在家。搞乜好?當然搞音樂!攞起結他彈奏經典靚歌。

彈下彈下,咦,一個人未夠過癮喎。於是,先錄一條聲,掟到美國俾昔日隊友Michael及Kenny三人合力一唱兩和,嘩,立時聽出耳油!

我點知?因佢傳咗首《The Painter》(Paul Anka優美之作)俾我囉!正到爆!立即火速傳俾一眾「樂迷知音」老友,包括《經濟日報》集團董事總經理史秀美,以及,中電企業發展總裁莊偉茵。兩位一聽,似我肥碌一樣,如獲至寶,聽完又聽。

你想聽?咁啦,此稿見報日,我將首歌上載Fanpage「Luke Sir曾智華」,大家齊齊享受啦!

Johnny「宅」在家,一樣可以令「眾樂樂」。呢種,正是Soomi Lee推介的「多姿多彩」生活。自己播下一粒種子,隨時四處開花㗎!

撰文 : 曾智華

欄名 : 肥碌出馬

緊貼財經時事新聞分析,讚好hket Facebook 專版