搭枱的荒謬

副刊版 2020/04/03

分享:

周二本欄標題為《咪問住、隔咗先》,刊出後,收到N種回應。最正路是:「大疫當前,為安全,先去馬,其他再研究細節。」

但亦有多項反對意見。不少認為香港萬計食肆中,有數千樓面只得三、兩百呎,你要佢枱與枱之間隔一點五米,等於叫佢執笠,完全不理現實可行性。

結果,條例一出,不少食肆「即時死亡」,又再多幾千員工失業。

我肥碌又如何?昨晨就親睹因《預防及控制疾病條例》未經深思熟慮而產生的爭拗,幾乎開片。

話說,我幫襯的一間大集團快餐廳,依足規矩,將一半座位封上透明膠紙,其他的,全部四座位同坐。

有一中年大漢坐在其中一枱開餐,為免有人搭枱,將報紙攤開,擺明「宣示主權」,唔歡迎人埋來。有人經過想坐,佢必然怒目視之。

但,餐廳封咗一半位,早餐時間點搞?終於,有位阿姐托住餐盤想坐低,大大聲:「唔該借歪!」中年大漢神情不悅:「喂,阿姐,話明分隔一點五米啊,你坐埋我度,大家可能感染病毒,唔合規矩喎!」

阿姐看來並非善類,還擊:「阿叔,你有無睇法例㗎?一點五米係枱與枱之間,唔係人與人之間喎!係呀,隔枱唔隔人,好戇居呀,你可以鬧爆政府,但唔可以唔俾我坐低!」

結果.....中年大漢死死氣收聲。但兩人相距無半米面對面開餐,雙方怒目而視。大漢又不時「玩嘢」扮咳,唉.....大戰隨時一觸即發!

究竟邊個師爺設計法例,枱要隔離但陌生人又准搭枱㗎,完全無邏輯!

撰文 : 曾智華

欄名 : 肥碌出馬

緊貼財經時事新聞分析,讚好hket Facebook 專版