八達通錶大錯摸

副刊版 2020/04/06

分享:

有兩間店舖,我肥碌凡踏入去,必定「中招」(即自動幫襯)。兩皆在九龍城獅子石道,一為八十一號的「一加一眼鏡」,另一為對面七十六號商場仔內的「世達鐘錶」。

點解?要由二十多年前講起。當年,一到午餐,港台同事必拉大隊到九龍城覓食,因廣播道無酒樓(電台飯堂食到厭!)。所以,同事多散步落九龍城。飽飽後,逛逛街,再五人一部的士搭返香港電台。

逛街時,因全部四眼仔女,又喜歡買廉價卡通電子錶,碰啱九龍城廣場內的「一加一眼鏡」及「世達錶行」兩店老闆皆平易近人。總之,電台職員嚟幫襯,八折!

隨時日過去,小弟當然成為熟客。凡朋友想配眼鏡及買時款錶,知我有折,多要求帶去。

就此,每年最少每間店去兩至三次。結果,哈,次次無走雞,朋友在選眼鏡及錶時,自己就會心癢難擋,揀埋一份。於是,次次本來陪老友shopping,變咗自己「滿載而歸」。

前天又中!陪老虎乸到「世達」換錶帶,無聊,見到N咁多款八達通錶,部分更有我喜歡的Line Friends公仔!

「唔該,我買兩款長者Line錶。」

點知,老闆肥仔達面有難色答:「碌Sir,長者八達通無Line的,只有呢幾款傳統點的!」

喂,有無搞錯?

如今乜年代,「八達通錶」個老闆肯定老套人,才會以為六十歲以上「長者」喜歡阿伯阿婆嘢,故只出幾款呆爆錶配合。唉,完全錯摸囉!我肥碌要彩色青春款呀!

撰文 : 曾智華

欄名 : 肥碌出馬

緊貼財經時事新聞分析,讚好hket Facebook 專版