「天地同心」社交距離

副刊版 2020/04/08

分享:

行走江湖,若有幽默感,必定受歡迎。

具幽默感者,多會有十隻八隻笑話「袋住」。任何社交場合,就攞出來令大家開心下。

表表者為馬會大董陳南祿(Philip),凡出現公眾場合,例必笑到見牙唔見眼(附圖)。兼且,一定有笑料。

最近,人人講work from home,social distancing,Philip一見小弟就笑:「肥碌,你睇我隻馬『天地同心』,幾鬼配合政府呼籲!」

乜事呢?原來,上周「天地同心」試閘,離晒大譜,完全吞噗hea跑。結果,十隻馬試閘佢跑第十。輸幾多馬位?ML!(即Many Lengths,遠到無得計!)唔願跑。

正常馬主,當然谷鬼氣啦!但陳南祿夠晒鬼馬,四圍話俾老友知:「我隻馬醒呀,知道如今疫情氾濫,為免領嘢,自動與其他馬保持social distancing。唔係一點五米,係一百五十米呀!佢其實根本唔想試閘,希望早早返馬房work from home!」

究竟,「天地同心」係咪渣馬呢?上季就係,輸到跌落五班。但踏入今季,轉五歲,開始嚟料。

基於此馬凡試閘都差到無人有(詐傻扮懵?),故去年尾今季初出,配冷門騎師希威森,竟然有七十三倍賠率!結果,剷入第二位,Q派千千聲。馬迷以為佢符碌,結果,再出又冷,再出,W埋添,真係……

撰文 : 曾智華

欄名 : 肥碌出馬

緊貼財經時事新聞分析,讚好hket Facebook 專版