2020年報銷

副刊版 2020/04/08

分享:

「有人提議:不如報銷咗2020年,當無事發生過,出年先至係正式嘅2020年,所有今年做唔到嘅嘢,出年可以做番晒,大家有咩睇法?」好事之徒在損友吹水大會視像會議上,提出這個相當有趣的問題。「我最關心嘅係,到底英超今年會唔會報銷?利物浦攞唔攞到英超冠軍?如果出年從頭嚟過,咁係咪踢埋剩低嗰九場英超賽事,定係當無事發生?」損友甲乃利物浦的死忠粉絲,他一臉疑惑地問道。

「講明係報銷,即係所有嘢當無數啦!」損友乙再嚇一嚇損友甲。「咁你仲大件事啦!」好事之徒為損友甲出頭:「你做銀行,如果2020年報銷,咁我即係可以唔使供樓?唔使還息?」此話一出,輪到損友乙面色一變。損友丙說:「當大家有朝老去,弄孫為樂,同佢哋『講舊時』嘅時候,提到我哋人生中,竟然有一年唔見咗!諗下都覺得相當科幻,好睇過《慶餘年》,甚至將成件事提升到一個哲學嘅層次。」

報銷2020年這個想法,相當有創意,很大膽,雖然不可行,但其實已經在發生:所有經濟活動停頓、大家的社交生活停頓、國家與國家之間的商務來往停頓,似乎除了地球繼續悠然自轉之外,所有人類的活動都停頓了。「我哋以前成日叫大家唔好浪費每一日、唔好令每一日白過,原來係廢話,今日,為咗生存,我哋寧願乜嘢都唔做,每日都白過。」好事之徒說。

撰文 : 鄭丹瑞

欄名 : 依然快樂

緊貼財經時事新聞分析,讚好hket Facebook 專版