「港鐵‧藝術」扶貧畫展 籲公眾關注貧窮問題

行政人員版 04:00 2020/04/08

分享:

每當喺港鐵站睇到具水準嘅畫作,黛安都會覺得既驚喜又減壓,由即日起至7月1日,上環站及西灣河站嘅「港鐵‧藝術」又有精采畫作展出啦!今次嘅展品係超過30幅「1017唔食都得」繪畫比賽嘅優勝作品,每一幅嘅用色同構圖都好靚,仲相當有深層意義呢。

聽公關姊妹介紹,呢個繪畫比賽係「教會關懷貧窮網絡」舉辦嘅其中一項活動,旨在響應2019年10月17日聯合國「國際消除貧困日」,參加者有幼稚園小朋友、中小學生及公眾人士,唔同人都可以透過畫作表達對社會貧窮問題嘅關注,今次主題係鼓勵公眾同低收入人士分享資源。港鐵公司事務總監蔡少綿就話,佢哋好樂意提供平台去宣揚扶貧信息。

黛安知道,港鐵一向都有透過「港鐵‧藝術」呢個計劃,畀藝術家可以喺不同車站舉行藝術展覽,等更多人可以接觸唔同嘅藝術作品。公關姊妹就話,有興趣參與嘅藝術家及機構,可以致電港鐵熱綫2881 8888,或將建議書直接提交畀港鐵就得。

黛安好期待以後搭港鐵,都可以欣賞到更多有深層意義又出色嘅作品,各位藝術家,加油呀!

本文轉載自《晴報

每幅畫嘅畫功都好好,但大家唔好只係睇畫,要多啲幫助身邊有需要嘅人啊。

撰文 : 黛安 消息特靈八卦公關

欄名 : 八卦名利場

緊貼財經時事新聞分析,讚好hket Facebook 專版