宅吓宅吓宅上癮

副刊版 2020/04/09

分享:

哈哈哈,哈哈哈,今日標題,怕且無一個認識我肥碌的朋友會認同:「無可能!肥碌會呆在家而覺得是享受?咪呃人啦!」別人點諗,小弟控制唔到。其實,亦唔使理,關佢哋乜事呢?

不過,我倒理解一眾老友的「經驗判斷」:「肥碌無可能忍得住隔離生活嘅!」

咁結果又如何?你信唔信都好,我真係宅吓宅吓宅上癮!肯定過咗疫情後,仍會大部分時間過呢種生活,因實在舒適悠閒兼強身健體。

好嘞,講講我疫情之下每日做乜先!

朝早五點九起床,先祈禱,感謝上天俾多一日享受人生。然後,六點睇晨早新聞。

六點半到茶記食早餐,捧大疊主要報紙,刨足兩小時(仍未能睇完㗎),八點半開始晨運。

由山腳行到山頂,邊走邊唱歌,懶理別人以為我是傻佬。行到中途,不斷拉筋,上身拉,下身也拉,腰部尤甚。

十點回家,沖個靚涼,開始寫稿。十二點拖老虎乸出外歎其廣東茶,一盅幾件。一點半,飽飽,回家小睡,兩點瞓到三點,起身再睇埋報章副刊及評論文章。四點半,到街市睇睇有乜靚海鮮,掃番屋企俾菲傭姐姐Sally炮製。可能係生蝦、可能係肉蟹膏蟹,又或花甲海魚。

五點半睇一小時書,六點半煲Netflix劇集。七點半晚飯,睇新聞及一眾時事KOL YouTube。九點,回房,揸杯紅酒欣賞經典巨星演唱會DVD,大大聲一齊嗌,興奮到爆。

十點上床再睇網上娛樂當催眠。

或問,喂肥碌,你一日出三四次街,點算「宅」?對小弟來說,唔旅行、唔同老友飯聚……實在「宅」到無人有,但日日如此,原來都好鬼快樂㗎﹗

撰文 : 曾智華

欄名 : 肥碌出馬

緊貼財經時事新聞分析,讚好hket Facebook 專版