屈臣氏捐30萬個小童口罩 助學童迎復課

行政人員版 04:00 2020/05/27

分享:

香港已停課幾個月,黛安知道,中三至中五嘅學生哥今日開始復課,幼稚園高班(K3)至中二學生,就會喺下個月份階段復課。屈臣氏集團知道唔少家長呢段時間都為咗仔女四出撲口罩,所以聯同全港多個小學校長議會合作,特別捐贈30萬個小童口罩,等學生可以安心返學。

黛安聽公關姊妹講,今次係由屈臣氏集團義工隊合力協助包裝口罩,方便學校評估學生需要後,可以即時分發畀有需要嘅學生。校長可以按照個別學童實際需要,自行決定分發對象同數量,令急需要幫助嘅學生可以盡快得到口罩。幸好義工隊一呼百應,只係用咗1日就包裝好口罩,真係十分專業呀。講番今次捐贈嘅口罩規格,係日本品牌Nippon Mask,喺菲律賓製造,有需要嘅學校可填妥申請表格,最快今個月喺指定地點就可以領取口罩。有咗合規格口罩,學生哥可以安心使用,家長就放心得多啦。

本文轉載自《晴報

屈臣氏集團向有需要學童捐贈30萬個口罩。

撰文 : 黛安 消息特靈八卦公關

欄名 : 八卦名利場

緊貼財經時事新聞分析,讚好hket Facebook 專版