免嗌交妙法

副刊版 2020/08/19

分享:

有報道指出,近排很多人因疫情在家工作,導致疫症分手潮。見不到時又思念,對得多時又篤眼篤鼻,做人多矛盾!

認識不少朋友,有男有女,明明公司容許在家工作,卻經常返回辦公室,細問因由,不約而同地說:「成日對住(伴侶),唔癲都搞到癲呀!」咁誇張?!話晒都曾於N年前某個時刻,被對方觸動、觸電過嘛!「嗰陣時,鬼知佢愈老愈嘮嘈咩?!依家一日喺屋企就專搵嘢嚟挑剔,又麻煩又難服侍!」女朋友埋怨其老公。

另一女友也叫救命:「自從老公退休後,佢好揀唔揀,揀咗去學琴!弊在佢唔係蕭邦呢!彈嚟彈去都係一、二級,我日日焗住聽佢甩甩咳咳彈『一閃一閃小星星』十幾次呀!係咪寧願返工好過?!」看來,要在疫情下保持健康身心靈,不僅要堅守social distancing,適當的partner distancing也可能有益身心。有幾位朋友分享了跟伴侶在家相處妙法:

一、每天適當地給大家一點Me time(私人時間)和Me space(私人空間)。其間,彼此不打擾,更不會向對方點東點西或點佢做嘢。

二、在家中設「嗌交特區」,有嘢嘈就去那處,最好不要選睡房。有對幽默夫婦就選了洗手間,每逢嗌交,一方就提醒對方去廁所再嗌過,如此一來,喜感增五成,怒氣即減半,每次齊齊步向廁所時,彼此已忍不住大笑歡欣收場。

三、有高道行幽默女友教路:「當對方激到你紮紮跳時,唔使嘥氣拗,只要幻想佢喺醫院插晒喉瞓喺度唔郁得個樣,咁條氣當堂順咗一半!仲拗乜鬼吖!」驟耳聽,以為她在詛咒,實則這是很好的提醒——去到你要跟面前的人生離死別時,那些曾經執着過的、嬲到出煙、拗生拗死之事,其實只是細過微塵之雞毛蒜皮而已。

當我們意識到原來彼此相處是有限時,到後來回顧時或會後悔,那些原本可以珍藏的歡樂、浪漫時光,都統統浪費在怪責、吵架、埋怨上。人生的遺憾,莫過於是愛得太遲、想愛卻愛不得,不要讓這遺憾發生。

撰文 : 利嘉敏

欄名 : 攻關女子

緊貼財經時事新聞分析,讚好hket Facebook 專版