惠康派200萬張現金券餐券 逾25萬基層受惠

行政人員版 04:00 2020/10/29

分享:

疫情衝擊香港經濟,幸好仲有好多有愛心嘅企業撑起香港。黛安收到風,惠康噚日宣布將與超過70間慈善機構夥伴合作,向有需要嘅社群派發100萬張現金券,仲有100萬張餐券,總值接近$8,000萬,預計約有25萬人可受惠,真係好有意義!

黛安聽惠康香港及澳門常務董事鮑敬康分享,佢話今次將以小冊子形式派發現金券及餐券,每本小冊子包括4張$50現金券,及4張$28餐券,總值$312.受惠者可以喺惠康門市使用現金券,每次可使用多張,受惠人又可憑餐券到大部分7-Eleven換領餐盒,期望計劃可為本地社群解決燃眉之急。

牛奶公司北亞區及集團便利店業務行政總裁朱秉志亦同黛安講,本港持續受疫情影響,希望為香港作出更多貢獻。而上月惠康已啟動呢個總值超過$1.2億嘅「點點心意」回饋社會計劃,除咗派發$200萬現金券及餐券外,仲會通過「Yuu Give Back」計劃配對捐款最多$500萬。同時惠康又推出「日日有低價」計劃,成為本港首間超市鎖定逾300款貨品價格至少到明年3月31日。

今次協助統籌「點點心意」計劃嘅聖雅各福群會,該會總幹事李玉芝亦話,好高興同惠康合作進行回饋計劃,在疫情艱難時期向有需要人士提供日常必需品。計劃有意義又幫到港人,黛安都要畀個Like!

本文轉載自《晴報

圖為惠康香港及澳門常務董事鮑敬康(後排左5),聖雅各福群會總幹事李玉芝(後排右5)及惠康及聖雅各福群會其他代表,鮑敬康向李玉芝送上現金券及餐券。

惠康將向有需要社群派發100萬張現金券及100萬張餐券,總值近$8,000萬。

撰文 : 黛安 消息特靈八卦公關

欄名 : 八卦名利場

緊貼財經時事新聞分析,讚好hket Facebook 專版