香港迪士尼15周年推多款美食 公主甜品超吸睛

行政人員版 04:00 2020/10/30

分享:

香港迪士尼一向係大人細路嘅夢幻樂園,唔經唔覺已經15周年喇!黛安知道,為咗慶祝呢個大日子,以及年底即將開幕嘅「奇妙夢想城堡」,樂園特別準備咗多款主題創新菜式,好似用咗13位迪士尼公主,包括白雪公主、睡公主、愛莎女王等做主題製成甜品,蛋糕上仲有齊皇冠、蘋果等標誌,用嚟打卡一流!

今次公主系列蛋糕夠晒吸睛,口味亦好獨特。好似用白雪公主為主題嘅就用咗焦糖蘋果,加埋香草慕斯製成蛋糕,食落甜而不膩;茉莉公主就用咗印度拉茶,整成芒果奶茶慕斯蛋糕。迪士尼仲話,今次出嘅4款甜品只係打響頭炮,其他甜品之後就會分7個階段喺戶外小食亭登場。

此外,香港迪士尼樂園酒店「華特餐廳」亦會推出15周年下午茶,包括龍蝦沙律蟹子軟包、魚子配黑松露野菌撻,亦有各款果撻和蛋糕;仲有用城堡造型整嘅15周年主題脆脆朱古力柑橘慕絲蛋糕等。為咗配合近來大熱嘅Staycation,迪士尼旗下酒店除咗有房間折扣推廣,亦會推出「迪士尼朋友星級點心班連午餐」,及酒店餐飲購物禮券,經官網以優惠價$1,000購買總值$1,200禮券,好抵啊!

本文轉載自《晴報

撰文 : 黛安 消息特靈八卦公關

欄名 : 八卦名利場

緊貼財經時事新聞分析,讚好hket Facebook 專版