公關大龍鳳

副刊版 2021/02/18

分享:

凡事都可行,但並非俱有益處,如:公關大龍鳳。究竟如何鑑定公關大龍鳳呢?這是個很值得討論的問題。公關大龍鳳經常出現,甚至可能愈來愈多,皆因仍有些人樂此不疲去做,以為開個壇搞場大龍鳳就能達掩眼法之效。仍持此思維的阿哥阿姐,真係以離地之心度大眾之腹,有時不禁想問愛搞大龍鳳者:你估依家嘅公眾水平係閣下之水平乎?

大場面不一定是大龍鳳,但大龍鳳一定搞到大場面,因慌死人睇唔到,但凡同時中以下幾點者,就是一場公關大龍鳳:一、大龍鳳沒有解決到最核心的問題,成壇show只係show到做過吓嘢,而非真正做到嘢;二、大龍鳳show,時做時唔做,即是只選擇性地做,大多應去做時唔見佢做,往往在已唔多需要嘅時候,卻跑出嚟做;三、高層出現一陣,影完相馬上快閃,如:企業搞植樹日,幾小時之活動,只見高層到影相時刻才出現,拿着鋤頭作個狀,前後十分鐘,影完相後即鬼影都唔見。四、事前沒有成功指標(outcome audit),然後做完就自high話成功。甚麼是成功,牽涉目標是甚麼?付出的資源/成本和回報的比例是甚麼?即是,你搞嚟想點先?投放的資源同所得嘅結果有無唔合比例?例如:公關替品牌搞壇大龍鳳,勞民傷財,但翌日只有一兩家媒體稍有提及,公眾又毫無反應,咁又好唔好意思同客戶或老細講,此乃非常成功之作,取得一家媒體報道也是成績、成效顯著?

此時,心水清者會問:一、付出的資源和所得效益,若嚴重不合比例,事前即無把outcome audit仔細想好,那事後則宜低調一點,側側膊就算;若高調自high話成功,請問誇啦啦在哪一處?二、既然成功指標定得那麼低,那即是說,用其他更低成本、更少勞民傷財的方法,也很容易能達同樣(甚至更好)效益,為何成班人想不出個更佳之方法來?

愈虛的東西愈要聲勢浩大,公關大龍鳳暴露的,正是如此。

撰文 : 利嘉敏

欄名 : 攻關女子

緊貼財經時事新聞分析,讚好hket Facebook 專版