青協「機關王競賽」 同學們展現創意解難

行政人員版 04:00 2021/05/10

分享:

學生係社會未來主人翁,只要有創意,不可能嘅任務喺佢哋手上都變得有可能。黛安知道,青協上星期六舉辦咗「香港機關王競賽」,同學仔運用STEM(科學、科技、工程及數學)知識做出嘅唔同作品,真係令黛安歎為觀止!

今次比賽分兩項賽事,其中「機關整合賽」,今年度指定關卡主題係「工業4.0」,參賽隊伍要運用積木零件同環保材料搭建機關,模擬和展示智慧工廠嘅運作,不但要有輸送帶及乾燥裝置等較常見設備,亦要設計智能計數裝置及機械手臂等較複雜部件,更有同學仔運用感應器同微電腦設計出可計算原料數目嘅裝置。至於今年初中組冠軍博愛醫院陳楷紀念中學,就諗到用蘇打粉混合醋產生氣體用嚟推動水壓摩打。

另外,今年專為初小同學新增設嘅「積木創客杯」,同學仔要喺限時內搭建機械設計挑戰唔同任務,其中一項「我是神槍手」,同學仔要製作橡筋手槍,仲要喺比賽入面射中多個目標,相當考驗臨場反應,最終冠軍由港澳信義會小學奪得。

本文轉載自《晴報

撰文 : 黛安 消息特靈八卦公關

欄名 : 八卦名利場

緊貼財經時事新聞分析,讚好hket Facebook 專版