竄紅網絡的性教育廣告

副刊版 2021/07/13

分享:

今時今日的性教育內容,理應跟幾十年前有所不同。在網絡世界,想得到和想不到的,統統有齊,若性教育仍停留在齋講理論和用可愛得像Little Twin Stars的布公仔作講解示範,落後兼離地。性教育內容要update之餘,宣傳手法也要與時並進。

近日,新西蘭政府針對未成年人士在網上瀏覽色情資訊和影片的情況,推出性教育廣告,當局大膽地僱用兩名成人AV片的男女演員拍攝,故事講述AV二人組赤裸裸(重要部位打了格仔)地站在屋前按鈴,應門的是媽媽,AV二人組劈頭便說:「我哋嚟係因為你個仔啱啱喺網上搜尋我哋,即係,你明啦,佢睇緊我哋啲片呀!」媽媽眼都凸埋問道:「Um……佢經常睇你哋?」答曰:「係呀,用電腦、手提電腦、iPad、PlayStation App、Smart TV、佢手機,有時仲用埋你部手機睇添……But,你知啦,我哋通常只在成年人面前表演,但你個仔只係個細路咋喎!佢咁細,唔會知道咩叫關係,而我哋拍片亦唔care關係,不過我哋真實嘅人生絕非如AV片般㗎喎!」母親如夢初醒,急急呼喚兒子:「阿仔,有人搵你!」正津津有味地看AV片的兒子走出來,這個年僅十三的少年,看到兩位真人主角裸露現身家門,再望望阿媽,當堂嚇到O嘴。

廣告甫出即竄紅網絡,因場景真實、手法創新,兼具幽默感,新西蘭當局解釋:希望家長多點關注現時網絡生態環境中的主要問題和風險,鼓勵家長以不批判的態度,跟子女好好傾談,並解釋網上的性畫面,有哪些是跟現實情感生活有區別。

如何宣傳性教育也是重要一環,亞洲社會相對保守,未必敢起用AV演員做性教育宣傳那麼前衞,但我相信在布公仔卡通和AV演員之間,仍有很多空間可走前幾步,令本地性教育更能對應現時年輕人面對的各種性誘惑。

撰文 : 利嘉敏

欄名 : 攻關女子

緊貼財經時事新聞分析,讚好hket Facebook 專版