事先張揚平民肚

副刊版 2021/07/15

分享:

鮑魚一聽就知乃名貴食材,所謂「鮑參翅肚」,鮑魚在四大海味珍品中列居首位,但凡菜式一加「鮑魚」二字,不論街市鮑魚仔好、抑或鮑魚幼絲也好,又或鮑汁而已,盡管只配蹄爪,有個「鮑」字當堂升價幾倍。

俗語有云,「一口鮑魚一口金」,以金去形容一種食物,可想而知,幾咁矜貴。但,矜貴食材又並非個個鯁得落,硬鯁或加重痛風,皆因每百克鮑魚的嘌呤含量,約有一百一十二點四毫克,多食唔止滯,更會導致尿酸偏高,兼夾消化不良;原來一隻重一百二十克的鮑魚,約含二十克蛋白質(等於吃四隻蛋),貪食不知飽,會引起腸胃不適、胃氣脹、腹痛、腹瀉及便溏等徵狀。所以話,人要有自知之明,無咁大個胃就唔好鯁咁大隻鮑。

我自問胃功能普通,鯁唔落鮑魚等矜貴食材,所以,每逢有人請吃山珍海錯,俱禮貌婉拒。席中有鮑魚與否,根本不是焦點,要衡量的重點反而是:一、自己受唔受得起?二、食完會否有手尾(如消化不良)?三、無端端受人一餐山珍海錯,好意思嗎?現在這個年頭,有些情況,有功都不能受祿,更何況無功?

要避免白食人家一餐豪宴,易過借火,我會先發制人,事先講明,家常便飯便可,甚至會要求素食更好。我有時會事先張揚向邀請人說笑:「我個肚是平民肚,名貴食材無福消受,太豐盛會不舒服」,那對方自然會適當安排。又,事前一看食飯地方,即使未去過,自己就要醒目啦,例如:唔通人家請你去半島酒店食飯,你會以為是去半島冰室的價錢乎?這個誤會出現在周星馳電影當然好搞笑,但若在現實場景發生,則唔係咁好笑。

撰文 : 利嘉敏

欄名 : 攻關女子

緊貼財經時事新聞分析,讚好hket Facebook 專版