豪得起,才是一種福氣

副刊版 2021/08/05

分享:

做得朋友,當然要雙向,有時你豪俾我,有時又到我豪番俾你,那才有意思,而這個豪,可以是時間、心神、愛心、感情、幫忙等等。人與人之間能夠維持關係和情誼,離不開你氹下我、我又氹下你,今次你為我兩脅插刀,下次咪輪到我同你赴湯蹈火囉!最緊要彼此都曉得抱持着以下的態度對待人家對自己的好:一、有來有往;二、不奉旨;三、懂尊重和珍惜,那情誼基本上必能持續。

我經常半開玩笑地說:人生於世,各種的關係,朋友也好、情人也好,無非你搵下我笨,我又搵下你笨;「搵笨」此處並非指立心不良𢱑着數,而是指不完全對等的give and take,例如,今次我俾你搵下笨,我give你take,豪了一次給你,你下次識do,主動來一次你give我take,那就皆大歡喜。人與人之間就是這樣,根本彼此相交不可能每次都要求各方五十對五十的公平,但只要關係能開開心心兼容到有時你搵下我笨,我隻眼開隻眼閉,有時到我又搵下你笨,你又心甘命抵,那彼此就能有緣繼續歡喜來往。

因此,遇上以下一類人,絕不會交心:永遠單向,長期只有別人豪俾佢,卻從沒倒轉過來見他為別人拔刀相助。與骨子裏功利底的人交心,嘥氣兼嘥精神,尤其那些好日唔搵你,一搵你就真係搵你笨、唔慌好嘢之人。不過人生流流長,我們總會遇過幾個只往自己益處盤算的人,遇上了,毋須呻笨,之前你對人的那幾場真心相交,就當豪了出去;能豪得起,才是一種福氣。當然,亦無謂跟這類人繼續糾纏,世界何其大,優質朋友多的是。

撰文 : 利嘉敏

欄名 : 攻關女子

緊貼財經時事新聞分析,讚好hket Facebook 專版