給小妮子的一番話

副刊版 2021/08/12

分享:

契女踏入青春期,看見她和同學開始有少女心事,特意跟她來一次Girls' Night,一邊在咖啡室吃着蛋糕一邊跟她「談情說愛」。我說:「男仔/男人,離遠看是一回事,埋身拍拖和相處是另一回事。」契女問:「契媽,你意思係埋身睇醜樣啲?」我笑到合不攏嘴:「不是,意思即是話,跟你沒相干的人,當然齋看型、英、帥、靚、正,這些純視覺享受條件就已足夠,因為即使這個人有幾不濟事、質地如何,都不關你事。但揀男友或伴侶則不同,他會跟你有相干,那就要看質地。」

「咁點揀呢?」契女眼仔碌碌地問。「第一要訣:唔好聽佢講乜,要睇佢做啲乜。」契女瞪大眼續問:「講同做唔同㗎咩?」年輕人實在太年輕了,不知人世複雜,必須跟她打好個底:「一個人齋講我愛你,但他又會拖着另一個,那你會聽他跟你講的甜言蜜語,還是看他對你所做的實際傷害?」契女:「渣男!」幸好識分,我暗忖。

我再問:「一個人齋對你講『我將來會對你有幾好』,又或應承你這樣那樣卻啥都做不出來,那你會聽他講的天花龍鳳,還是看他的毫無行動?」「我明!講多無謂,行動最實際!」小辣妹一點即明。

最後,總結五點忠告:

一:Talk is cheap,只有肯為你真正付諸行動的人,才有資格跟你講「愛」。二:一個人,好有誠意去「諗」,不代表好有誠意去「做」,有些人甚至自以為諗咗等如做咗,例如學生跟老師說,「我真係好有誠意考第一㗎!」但卻不溫習又不做功課,誠意何在?一個人當下為你做甚麼或正在做甚麼,遠比他說日後將會為你做甚麼,來得更為信實和珍貴。三:別人的爛或渣,與你無關,只有在你死命不放時,才跟你連結上。當你選擇停止糾纏時,對方的一切爛或渣,就從那刻開始,跟你脫鈎。而你,在任何時候,都有選擇。四:物以類聚,要相信自己值得更好,保持心明如鏡,毋須踢爆,保持風度,繼續優雅。五:最緊要的是,自己也不要做渣女啊!

小妮子道:「放心契媽,我不會做渣女,亦唔會看上渣男,我是有點要求的!」我笑道:「孺子可教也!」

撰文 : 利嘉敏

欄名 : 攻關女子

緊貼財經時事新聞分析,讚好hket Facebook 專版