港隊羽球雙雄奧海城相聚 教市民「挑波」

行政人員版 04:00 2021/09/27

分享:

唔少人仲記得香港運動員喺東京奧運嘅英姿。東奧男子羽毛球港隊代表伍家朗同殘奧羽毛球WH2級男單銅牌得主陳浩源,噚日去咗奧海城嘅「擊拍」打氣會,除咗同觀眾分享比賽時嘅感受,更即席教市民「挑波」秘技,喺現場嘅黛安都感受到佢哋嘅熱力同魅力呀。

伍家朗分享,做運動員必定有贏有輸,重點係面對逆境時要保持正面心態,保持樂觀迎難而上,佢希望港人日後都能繼續支持香港運動員。陳浩源亦話,市民嘅支持會令更多新晉運動員有更好嘅基礎,令人相信運動員係一份值得人欣賞同信任嘅職業。佢哋更即場為市民嘅羽毛球簽名,唔少人都話會好好收藏。

而為咗延續奧運熱潮,奧海城2期地下主題中庭即日起至下月3日亦會舉行「志氣凌雲—香港體育紀行展」,展示多張香港體壇嘅珍貴圖片,好值得去睇㗎。

本文轉載自《晴報

不少市民前來一睹雙雄風範,並與他們「擊拍」打打氣。

撰文 : 黛安 消息特靈八卦公關

欄名 : 八卦名利場

緊貼財經時事新聞分析,讚好hket Facebook 專版