港韓簽3年備忘錄 韓劇綜藝來港取景

行政人員版 04:00 2021/09/28

分享:

韓劇攻陷全亞洲,黛安同身邊唔少朋友都係韓迷,旅發局公關姊妹仲透露喜訊,旅發局剛同韓國頂尖娛樂媒體公司CJ ENM簽署長達3年諒解備忘錄,等國際旅遊恢復後,就合作安排韓劇同綜藝節目來港取景拍攝,到時候一眾韓迷姊妹,就可以一睹炙手可熱嘅OPPA風采,全球觀眾屆時仲可以透過節目欣賞到香港嘅獨有魅力,仲有各地韓流粉絲可以嚟香港取景地朝聖,帶起旅遊熱潮。

講起CJ ENM,相信大家都唔陌生,事關佢旗下電視台tvN製作嘅韓劇同綜藝節目都大熱,好似玄彬同孫藝珍嘅《愛的迫降》、孔劉嘅《鬼怪︰孤單又燦爛的神》,仲有飲食綜藝《尹食堂》等,都成網上熱話。呢間公司仲同串流平台合作,播出宋仲基套《黑道律師文森佐》、近排大熱嘅《機智醫生生活》、《德魯納酒店》等。

根據備忘錄,由2022年至2024年,CJ ENM會喺不同類型電視節目注入香港獨特文化同體驗,旅發局亦會就節目嚟香港取景提供意見。今次合作可謂互惠互利,旅發局主席彭耀佳都話,預計國際旅遊重啟時,競爭相當激烈,旅發局做好部署維持香港國際曝光。

本文轉載自《晴報

韓劇綜藝俘虜不少港人的心,當中包括tvN的熱門綜藝《尹食堂》。

港韓簽定備忘錄,CJ ENM會於不同類型電視節目注入香港獨特文化體驗。

撰文 : 黛安 消息特靈八卦公關

欄名 : 八卦名利場

緊貼財經時事新聞分析,讚好hket Facebook 專版